Ginduso ni South Cotabato Governor Reynaldo Tamayo Jr. ang dugang nga gahum kag pondo para sa mga lokal nga panguluhan, kasabay sang iya pahayag sa P96 kada adlaw nga poverty benchmark sang Philippine Statistics Authority (PSA) kag Department of Economy, Planning and Development (DEPDev).
Suno kay Tamayo, mas nahibaluan sang lokal nga mga opisyal ang aktuwal nga panginahanglan sang ila komunidad.
Lakip sa iya ginmitlang ang P244 milyon nga pondo nga nabaton sang South Cotabato, apang kinahanglan pa ini dugangan agud mapabakod ang lokal nga serbisyo.
Ginpahayag man niya nga indi lamang income ang dapat basihan sang kaayuhan sang pamilya, bangud nagadepende sa lokasyon kag kahimtangan ang ila gasto kag panginahanglan.
Halimbawa, sa mga lugar nga may madamo nga tanom, prutas kag gulay, mahimo nga makabaton sang masustansya nga pagkaon bisan limitado ang kita.
Samtang, ang poverty threshold sang PSA nagalakip sa minimum nga kinahanglanon para sa pagkaon kag non-food needs, samtang ang food threshold nagatutok sa minimum nga gasto sa pagkaon.
Dugang ni Tamayo nga ang pagkaon, puluy-an, trabaho, edukasyon kag panglawas dapat maangkon sang tanan.
Gindugang niya nga kinahanglan man ang hugot nga monitoring kag transparency sa paggamit sang pondo agud malikawan ang korapsyon kag masiguro nga makabenepisyo ang mga pumuluyo.
