Nagalaum ang isa ka residente sang Syudad sang Koronadal nga mangin responsable ang mga botante sa pagpili sang ila mga lider sa 2028 national elections paagi sa pagsuporta sa mga kandidato nga mapainubuson, masaligan kag may sinsero nga handum sa pagserbisyo sa publiko.
Sa interview sang Bombo Radyo Koronadal, ginpahayag ni Jud Talusan, isa ka magaparehistro sa Commission on Elections (COMELEC), nga kuntani hatagan sang kahigayunan ang mga kandidato nga mahapos mapalapitan kag preparado magpamati sa mga problema kag kinahanglanon sang katawhan.
Dugang pa niya, importante nga ang mga mapilian nga opisyal magpabilin nga malapit sa ila mga ginserbisyuhan kag tumanon ang ila responsibilidad bisan matapos ang piniliay.
Ginpahayag man ni Talusan nga mas ginakilala niya ang mga kandidato nga indi man gid kilala ukon popular, apang nagapakita sang sinsero nga pagserbisyo kag paghatag prayoridad sa kaayuhan sang komunidad.
Bangud sini, nagalaum siya nga gamiton sang mga botante ang ila katungod sa pagpili sang mga lider nga may integridad kag matuod-tuod nga nagaserbisyo sa katawhan.
