Ginabulubanta nga P1 bilyon ang kinahanglan nga pondo agud mapatuman ang Master Drainage System Plan sang Koronadal City, nga ginatan-aw nga malawig nga solusyon sa padayon nga problema sang pagbaha sa siyudad.
Sa interview sang Bombo Radyo Koronadal, ginpahayag ni Koronadal City Mayor Erlinda Araquil nga madugay na nga ginaplano ang proyekto, apang wala pa ini maumpisaha bangud sang kakulangan sang pondo.
Bangud sini, nagapangabay ang City Government sang bulig pinansyal halin sa Department of Public Works and Highways, national government, kag congressional office agud mapadasig ang implementasyon sang proyekto.
Suno sa alkalde, ang masami nga pagbaha sa nagkalain-lain nga bahin sang Koronadal nagatuga sang peligro sa kabuhi, pangabuhian, kag mga imprastraktura sa siyudad.
Bangud sini, ginalauman sang lokal nga panguluhan nga pinaagi sa bulig sang nasyonal nga gobyerno, maumpisahan na ang proyekto agud mahatagan sang permanente kag epektibo nga solusyon ang problema sa pagbaha.
