Nagpahibalo si Israeli Prime Minister Benjamin Netanyahu nga ipadayon niya ang giyera sa Gaza kon indi buhian sang Hamas ang ila bihag.
Ini ang iya sabat sa pahayag sang Hamas nga untaton anay nila ang pagpagwa sang bihag bangud sa ginahambal nga paglapas sang Israel sa ceasefire deal.
Dugang pa ni Netanyahu, kon indi mabuhian ang mga bihag antes magtapos ang una nga hugna sang ceasefire sa Sabado, indi magduha-duha ang Israel nga ipadayon ang mabaskog nga giyera batok sa Hamas.
Ginpahayag man niya nga indi sila untat sa pag-atake sa kuta sang Hamas hasta nga mapapas ini tanan.
Nahibaluan nga ginpahayag sang Hamas nga napuno na sila sa padayon nga paglapas sang Israel sa ceasefire nga gindeklarar sang Enero 19.
Pipila sa ginatudlo nga paglapas sang Hamas amo ang padayon nga pag-atake sang Israel sa Gaza, ang pagpugong sang 600 ka aid trucks nga makasulod, ang indi pagtugot nga makapatindog sang 200,000 ka tents, kag ang indi pagtuman sa kasugtanan nga may 50 ka pasyente nga dal-on sa ospital kada adlaw.
Ginpunggan man sang Israel ang pagpasulod sang mga heavy equipment nga gamiton sa pag-ayo sang naguba nga mga estraktura sa Gaza.
