Nagpasa sang resolusyon sa Kamara si Mamamayang Liberal Partylist Representative Leila de Lima agud awhagon ang gobyerno nga liwat nga magpakigbahin sa International Criminal Court pinaagi sa pagbalik sang Pilipinas sa Rome Statute.
Sa idalum sang House Resolution No. 1056, ginapanawagan sang kongresista kay Ferdinand Marcos Jr. kag sa Department of Foreign Affairs nga umpisahan ang nagakaigo nga proseso agud makabalik ang pungsod bilang miyembro sang ICC.
Suno kay De Lima, ang pagbalik sang pagkamiyembro sang Pilipinas sa ICC magapakita sang mabakod nga panindugan sang gobyerno sa pagpanalipod sang tawhanon nga kinamatarong kag sa pagbatok sa mga mabug-at nga krimen nga may epekto sa internasyonal nga komunidad.
Dugang pa niya, ang pagbalik sa Rome Statute mahimo man nga magpalig-on sang kredibilidad sang pungsod sa internasyonal nga entablado kag magpabakod sang pagsalig sang publiko sa mga institusyon nga nagapatuman sang hustisya kag rule of law.
Tuyo sang resolusyon nga mapalig-on ang commitment sang Pilipinas sa accountability, human dignity kag pagrespeto sa balaud, samtang ginapakita ang kahanduman sang pungsod nga makigbahin sa internasyonal nga mga paninguha para sa hustisya kag pagpanalipod sang kinamatarong sang katawhan.
