Magasugod sa Nobyembre 30, 2026 ang opening statements sa kaso ni anay Presidente Rodrigo Duterte sa International Criminal Court (ICC), kag ginapaabot nga magsunod dayon ang testimonya sang una nga testigo sang prosekusyon.
Suno sa ICC, antes magsugod ang mga pahayag, kumpirmahon anay sang mga hukom kun naintiendihan ni Duterte ang mga kaso nga ginapangatubang niya kag pamangkuton kun nagaangkon siya sang sala ukon nagapahayag nga wala siya sing sala.
Nahatagan ang prosekusyon sang anum ka oras para sa opening statements, samtang tatlo ka oras naman ang alokasyon para sa mga representante sang mga biktima.
May kahigayunan man ang depensa nga maghatag sang iya pahayag. Ang kaso may kaangtanan sa tatlo ka ihap sang ginapahayag nga krimen kontra sa katawhan nga nalambigit sa kampanya kontra droga sang administrasyon ni Duterte.
Mahimo masubay sang publiko ang paghusay paagi sa opisyal nga website kag iban pa nga social media platform sang ICC, nga may 30 minutos nga delay.
