Nagpahayag ang gobyerno sang Iran nga indi pa ini mag-untat sa pagsuporta sa mga alyado sini sa Middle East, bisan pa sa nagadugang nga kabudlayan sa ekonomiya bangud sang mga sanction sang Estados Unidos kag nagapadayon nga kinagamo.
Suno kay US Central Command chief Brad Cooper, nagtuga sang dako nga halit sa ekonomiya sang Iran ang mga operasyon militar kag pagbalabag sa mga pantalan sini. Ginpahayag niya nga nalab-ot sa $25 bilyon ang balor sang mga crude oil export nga na-intercept, samtang $350 milyon nga cryptocurrency assets ang gin-freeze sang US.
Bangud sini, gin-angkon sang panig sang US nga mahimo mag-atubang sang problema sa pondo ang Iranian Revolutionary Guard Corps (IRGC) kag mga kaalyado sini, lakip ang Hezbollah sa Lebanon kag Houthis sa Yemen, ilabi na sa pagbayad sang sweldo sang ila mga miyembro.
Sa pihak sini, wala ginbaton sang mga opisyal sang Iran ang mga pahayag nga nagapakita sang nagagrabe nga kahimtangan sang ila ekonomiya. Apang, suno sa pagbanabana sang World Bank, mahimo mag-ugdang sang 7.7 porsiyento ang ekonomiya sang pungsod sa fiscal year 2026–2027.
Samtang, ginpahayag ni Iranian President Masoud Pezeshkian nga magasalig ang gobyerno sa lokal nga mga pondo agud maatubang ang mga epekto sang mga restriksyon.
Nagaplano man ang administrasyon nga maghatag sang electronic food vouchers agud mabuligan ang mga pumuluyo sa pagbakal sang ila panguna nga kinahanglanon sa tunga sang nagapadayon nga krisis.
