Gin-insister ni House impeachment team spokesperson Zia Alonto Adiong nga yara sa ginatawag nga “echo chamber” kag “parallel reality” ang mga diehard supporters ni Vice President Sara Duterte.
Suno kay Adiong, wala na ginalauman sang prosecution nga ma-apresyar sang mga tagasuporta ni Duterte ang mga ebidensiya kag testimonya nga ginapresentar sa impeachment trial.
Sa baylo, ginpahayag sini nga tinutuyo sang prosekusyon nga mapakita sa mas madamo nga Pilipino ang kamatuoran sandig sa mga ebidensiya nga ginlatag sa Senado.
Gin-insister pa ni Adiong nga may nagakaigo kag makakumbinsir nga ebidensya ang prosekusyon agud mapakita nga may natabo nga pagluib sa pagsalig sang katawhan.
Isa sa mga nagapanguna nga isyu subong amo ang ginapatihan nga sala nga paggamit kag indi husto nga liquidation sang confidential funds ni Duterte.
Suno kay Adiong, kinahanglan maathag nga maipaliwanag kon diin naghalin ang pondo sang gobyerno, paano ini gingasto, kag paano ini ginpatago ukon wala nahatagan sang nagakaigo nga pagpaathag.
Dugang pa niya, nagapabilin kay Vice President Sara Duterte ang responsibilidad sa mga pondo nga ginakuwestyon sa impeachment trial.
