Ginpangabay si Senator-judge Erwin Tulfo sa impeachment court nga repasuhon ang vote threshold ukon kadamuon sang boto nga kinahanglan para sa pinal nga desisyon sa impeachment trial ni Vice President Sara Duterte.
Suno kay Tulfo, apat sa 24 ka senator-judges ang kasubong wala sa coercive authority sang Senado.
Lakip diri si Senator Loren Legarda nga yara sa medical leave sa guwa sang pungsod, si Senator Bato dela Rosa nga nagapabilin sa pagtatago, kag sanday Senators Jinggoy Estrada kag Rodante Marcoleta nga yara sa detention bangud sa mga kaso nga plunder.
Ginpangayo ni Tulfo ang mas klaro nga guidelines parte sa vote threshold, ilabi na samtang nagapalapit na sa katapusan ang impeachment proceedings.
Gindugang niya nga indi ini para panubuon ang kinahanglanon nga boto, kundi agud masiguro ang patas kag transparent nga proseso.
Sa pihak nga bahin, nanindugan naman si Senator Robin Padilla nga dapat sundon ang Konstitusyon sa isyu sang threshold.
Suno sa iya, indi ini basta-basta nga dapat bag-uhon kag kon may pagbag-o, kinahanglan ini himuon sa husto nga proseso.
Ginklaro ni Senator-Judge Bam Aquino nga lain ang isyu sang voting threshold sa pagdeterminar kon guilty ukon innocent ang respondent.
Samtang, ginkwestyon ni Senator-judge Pia Cayetano ang manifestation ni Tulfo kag ginakabig ini nga unconstitutional.
Suno kay Cayetano, indi papel sang senator-judges ang pag-interpret sang layi, ilabi na nga may yara na sang ruling bahin sa amo nga isyu.
Ginpahanumdom ni Cayetano ang ruling ni Presiding Officer Francis “Chiz” Escudero nga nagapabilin sa two-thirds threshold ang kinahanglanon nga boto para sa pinal nga desisyon sa impeachment trial ni VP Sara Duterte.
