KORONADAL CITY- Nagapangayo karon sang bulig ang pipila ka mga residente sang Brgy. Lampitak, Tampakan South Cotabato matapos nga nagakulang na gid ang suplay sang tubig tuga naman sang nagapadayon nga nabatyagan nga tag init.
Sa interbyu sang Bombo Radyo Koronadal kay Marinillo M. Ngalon, Kapitan sang Brgy. Lampitak, Tampakan, South Cotabato, mas nagapadayon sa karon ang ila nga pagpanawagan bangud lima na ka bulan ini nga kakulangon sang tubig ang ila nga naeksperyensyahan.
Apang sa pihak sini dako man ang ila nga pagpasalamat nga padayon man nga ginasuplayan sang LGU Tampakan ang ila nga lugar bangud sa pagkahubas sang tubig kag iban pa nga water source sa Barangay Lampitak.
Yara sa masobra sa 10,000 ka litro sang tubig ang ginarasyon sa 300 ka mga pamilya ang ila ginarasyunan sang tubig kada semana bangud sa kakulang sang tubig sa hinambitan nga barangay tuga sang nagapadayon nga epekto sang El Niño.
Nahibaluan nga naghubas na ang halos tanan nga Deep Well kag iban pa nga water source sa nasambit nga lugar rason para magpatigayon sang pagrasyon sang tubig agud may mainom kag magamit ang mga residente.
