Masobra 7.5 milyon ka indibidwal ukon 2.1 milyon ka pamilya ang naapektuhan sang pinagsumpong nga epekto sang mga bagyong Luis, Maymay kag Neneng, upod ang habagat, suno sa National Disaster Risk Reduction and Management Council (NDRRMC).
Suno sa report, nagalakip ang mga apektado sa nagkalain-lain nga rehiyon sa Luzon, Visayas kag Mindanao.
Sa sini nga kabug-usan, 34,103 ka indibidwal halin sa 9,872 ka pamilya ang nagapabilin sa mga evacuation center.
Samtang, 29 ang napatay, 19 ang napilasan kag tatlo ang ginareport nga missing bangud sa mga weather disturbance.
Nagapabilin man nga 89 ka lugar ang yara sa idalom sang state of calamity.
Sa epekto sa mga puluy-an, 2,600 ka balay ang partially damaged kag 269 ang totally damaged.
Dako man ang nangin epekto sa imprastraktura kag agrikultura, nga naglab-ot sa ginabulubanta nga ₱4.9 bilyon ang danyos sa imprastraktura kag ₱1.7 bilyon sa agrikultura.
Samtang, ₱1.24 bilyon nga ayuda ang naipanghatag na sa mga apektado nga komunidad.
