Nagsaka pa sa 34,749 ka mga pamilya ang apektado sang pagbaha dulot sang Bagyo nga Ferdie sa probinsiya sang Maguindanao del Sur.
Ini ang sandig sa ginpaguwa nga datos sang Provincial Disaster Risk Reduction and Management Office paagi kay PDRRMO Head Tim Ambolodto.
Ang mga barangay nga apektado ang nagikan sa 14 ka mga banwa kun diin pinakamadamo nga apektado ang nagikan sa mga banwa nga yara sa SPMS box kasubong sang Shariff Aguak, Datu Saudi Ampatuan, Mamasapano, kag Shariff Saydona kun diin ang Mamasapano ang may pinakamataas nga numero sang apektado nga naglab-ot sa 7,000 ka pamilya.
Suno kay Ambolodto nga ang mga tubig gikan sa kabukiran sang Datu Abdullah Sangki kag Ampatuan ang nagdulot sang pagbaha sa nasambit nga mga lugar.
Lakip na diri ang tubig nagikan sa Allah River kun diin nagadamo an tubig bangud sa naeksperiensiyahan nga pabuhos sang ulan sang mga lugar sa South Cotabato.
Kadam-an sa mga biktima ang home-based samtang may mga nagbakwit man nagikan sa Datu Saudi Ampatuan.
Kaangot sini, ginpasiguro ni Ambolodto nga handa ang provincial evacuation center sa tion nga kinahanglan ini.
Nahibaluan nga antes pa man ang pagpanalasa sang bagyo nga Ferdie kag Gener, nakaeksperiensiya na sang masami nga pag-ulan ang Mindanao bangud sa hanging habagat.
