KORONADAL CITY – Wala na sang kabuhi sang masapwan ang isa ka tuig nga bata nga lalaki matapos ini nahulog kag naanod sa irrigation canal sa Purok Magsaysay, Barangay Namnama, Koronadal City, Miyerkules sang hapon.
Sa eksklusibo nga interview sang Bombo Radyo Koronadal sa iloy sang biktima nga si Jenny, pasado alas-5:30 sang hapon sang natalupangdan nila nga nadula ang iya bata.
Gani, gilayon nila ini nga ginpangita apang wala na ini sa palibot sang ila balay.
Nakita man sini nga bukas na ang gina-harang nga bulak sa eskinita paguwa sa ila ugsaran nga posible gin-agyan sang bata padulong sa lining.
Mga alas-6:45 sang gab-i na sang nasapwan ang bata sa bahin sang Lower Manili, Lutayan, Sultan Kudarat.
Ginkumpirmar man sang amay ni Jenny nga gingtinguhaan pa nga i-revive ang bata apang wala na ini sang kabuhi.
Sa tunga sang tuman nga kasakit, ginpakigbahin man ni Jenny nga walo ka tuig sila nga naghulat sang iya bana antes nag-abot ang amo nga bata kag wala sila naga-ekspektar nga kuhaon man ini sang temprano.
Antes ang trahedya, ginpahayag sang iloy nga sa una nga tion, ginhakos sia sang iya bata samtang ginatudlo ang panganod samtang masanag ang langit.
“Palangga ka gid ni Mama. Ginkuha ka ni Lord, mas palangga ka niya kaysa sa amon. Wala gid sang mas makalabaw sang pagpalangga sang Ginoo. Indi ko bal-an kon paano magpadayon nga wala ka… pero para sa manghod mo, kayanon ni Mama tanan,” ang emosyonal nga pahayag sang iloy.
Nagpanawagan man si Jenny sa LGU nga hatagan sang atensyon ang seguridad sa mga irrigation lining sa amo nga area agud indi na maliwat ang amo nga disgrasya kag maprotektahan ang iban pa nga mga kabataan.
