Ginpabutyag sang isa ka ginikanan kag environmental activist ang mas istrikto nga pagpatuman sang gun laws kag mas responsable nga gun ownership sa Pilipinas bangud sa posible nga epekto sang armas sa seguridad kag pamatasan sang mga kabataan.
Sa interview sang Bombo Radyo Koronadal, gin-angot ni Lexi Acosta, ginikanan kag environmental activist, ang isyu sa mga nagluntad nga school shooting incidents sa Tacloban kag Zamboanga, nga suno sa iya nagapakita sang panginahanglan nga tutukan ang access sang mga kabataan sa armas-luthang.
Suno kay Acosta, mahimo magtuga sang “school shootings” ang mga insidente sang pagpangluthang kag iban nga krimen.
Pagkatapos sang amo nga mga hitabo, may mga nagasunod nga report sang kabataan nga nagadala sang armas sa buluthuan, nagapamahog sa social media kag nagahimo sang iban nga bayolente nga binuhatan.
Gindugang niya nga indi lamang ang pag-access sa armas ang dapat tutukan, lakip man ang mga posible nga nagtulod sa isa ka indibidwal sa paghimo sang krimen, lakip ang mental stress, bullying kag iban pa nga social factors.
Para kay Acosta, kinahanglan ang mas responsable nga pagpanag-iya kag pagtipig sang armas, mas hugot nga pagpatuman sang mga gun laws, kag mas mabakod nga suporta sa mga kabataan agud malikawan ang pagbalik balik sang amo nga mga insidente.
