KORONADAL CITY – Padayon ang hugot nga pag-monitor kag pagbantay sang Marbel 7 National High School, kaupod ang mga otoridad, matapos ang sunod-sunod nga pagpamahog nga naglapta sa social media batok sa nasambit nga buluthuan.
Sa interview sang Bombo Radyo Koronadal kay Assistant Principal Ivan A. Ilupa sang Marbel 7 National High School SHS Department, iya ginpahayag nga mas ginpahugtan pa nila ang seguridad sa palibot kag sulod sang buluthuan agud masiguro ang kaluwasan sang mga estudyante kag personnel.
Suno kay Ilupa, seryoso kag maid-id ang ila pag-imbestigar sa mga social media threats, bangud indi nila ini pagpakaligad agud malikawan ang posible nga peligro.
Padayon man ang ila koordinasyon sa mga otoridad agud matukiban ang identidad sang mga nagapalapta sang mga pamahog kag nagapahadlok sa publiko paagi sa social media.
Samtang, antes sini, nakarekober ang mga nagabantay sa gate sang eskwelahan sang isa ka kutsilyo ukon patalom sa isa ka estudyante sang eskwelahan samtang nagapatigayon sang inspeksyon, Martes sang aga, Setyembre 22, 2026, kadungan sang pagbalik sang face-to-face classes sa buluthuan.
Sa karon, padayon ang hugot nga pagbantay sa nasambit nga buluthuan samtang ginapangita pa sang mga otoridad ang mga yara sa likod sang mga social media threats.
