Nagapanawagan ang Titans Hog Raisers Region 12 sa mga LGU sa South Cotabato nga magpagwa sang executive order para sa minimum floor price sang buhi nga baboy, suno sa ginpatuman na sang Banwa sang Tampakan, South Cotabato.
Sa interview sang Bombo Radyo Koronadal ginpahayag ni Arnel Barroso Jr., presidente sang grupo, indi bastante ang tag-₱100,000 nga ayuda sa lima ka asosasyon kag kooperatiba bangud ginapaambit ini sa ginatos nga miyembro kag indi makasakop sa daku nga pagkalugi sang mga hog raisers.
Ginkwestyon man niya ang wala pa matuman nga feed mill nga ginpromisa apesar halos duha na ka bulan ang nagligad.
Bangud sa kapierdihan, may mga hog raisers sa Koronadal, Tupi, Polomolok, Surallah kag Banga nga nagabaligya na sang ila mga nayon nga baboy agud malikawan ang dugang nga utang.
Gin-awhag ni Barroso ang mga Banwa sang Tupi, Polomolok, T’boli, Banga, Lake Sebu kag Santo Niño nga sundon ang Tampakan sa pagpatuman sang minimum floor price.
Ginpahayag man niya nga tatlo na ka formal letters ang ginpasa sa opisina sang alkalde sang Polomolok apang wala pa sang sabat.
Gani, ginakonsiderar sang grupo ang paghiwat sang rally agud mapabati ang ila panawagan para sa konkreto nga aksyon kag proteksyon sang lokal nga hog industry.
