Nagaplano si Ombudsman Jesus Crispin “Boying” Remulla nga magpasaka sang reklamo sa Department of Information and Communications Technology ukon DICT kag Facebook batok sa mga social media account nga ginatudlo nga nagalapta sang sala nga impormasyon parte sa iya kahimtangan sa panglawas kag sa Office of the Ombudsman.
Suno kay Remulla, indi lamang personal nga impormasyon ang naapektuhan sang amo nga mga post kundi posible man nga makahalit ini sa kredibilidad kag pagsalig sang publiko sa institusyon nga iya ginapangunahan.
Ginpahayag niya nga may mga account nga nagapakalapta sang nagkalain-lain nga impormasyon nga wala sang nagakaigo nga basehan, kag posible nga ginahimo ini agud magpatubo sang pagduhaduha kag maghatag sang negatibo nga impresyon sa publiko batok sa iya opisina.
Bangud sini, plano ni Remulla nga pangayuan ang Facebook sang nagakaigo nga aksyon, lakip na ang pagpakakas sang mga account nga ginagamit sa pagpalapta sang propaganda kag indi matuod nga impormasyon.
Ginpanginwala man sang Ombudsman ang mga report nga nagahatag sang lain nga impormasyon parte sa iya kahimtangan, kag ginpahayag nga halos tatlo na ka tuig nga wala siya sang cancer.
Nagpasalamat man siya sa mga tawo nga nagpakita sang pagkabalaka kag padayon nga nagapangamuyo para sa iya kaayuhan, ilabi na sa tunga sang paglapta sang mga balita nga nagapamangkot sa iya kahimtangan.
Madumduman nga nagpaidalom si Remulla sa quintuple bypass surgery sang 2023 matapos nga nadiskubre ang problema sa iya tagipusuon. Sa amo man nga tion, nadiskubre man nga may leukemia siya.
Ginpaathag niya nga kinahanglan untatan ang paggamit sang social media sa pagpatigayon sang mga kampanya sang disinformation, bangud mahimo ini magresulta sa pagdula sang pagsalig sang publiko indi lamang sa isa ka opisyal kundi pati na sa mga institusyon sang gobyerno.
