Nagbalik ang kilig sa mga fans sang American singer-songwriter nga si Ariana Grande matapos niya ipaambit sa social media ang pila ka laragway nila sang iya anay nobyo nga si Ricky Alvarez.
Paagi sa isa ka post, ginpakita ni Ariana ang ila mga matahum nga moments upod si Ricky, lakip na ang isa ka laragway kun sa diin makita ang duha nga nagahakos samtang nagatulokayay nga daw puno sang pagpalangga.
Sa isa pa ka laragway, makita man si Ariana nga nagahalok sa agtang ni Ricky samtang nakapiyong ini, nga dugang pa nga naghatag sang atensyon kag kilig sang ila mga fans.
Gilayon nga nagdagsa ang mga reaksyon sa comment section sang post, kun sa diin madamo ang nagbilin sang heart emojis kag nagpaathag sang ila kalipay sa makita nga pag-updanay sang duha.
May pila man ka fans nga nagakabig sa ila bilang isa ka cute nga magkapareha kag nagpabutyag sang paglaum nga may espesyal liwat nga nagatabo sa ila relasyon.
Madumduman nga anay nga nagrelasyon sanday Ariana kag Ricky, gani nangin sentro liwat sila sang diskusyon sa social media bangud sang ila bag-o nga mga laragway.
Apang, bisan pa sang mga sweet nga hulag kag laragway nga ila ginpaambit, wala pa sang opisyal nga kumpirmasyon halin kanday Ariana kag Ricky kun nagbalik na bala sila sa isa ka romantiko nga relasyon.
