KORONADAL CITY – Ginbawian na sang kabuhi ang isa ka lalaki nga biktima sang pagpanglampos sang himata man sini nakaupod sini sa ilimnan sa Barangay Magsaysay, Koronadal City.
Ginkilala ang biktima nga si Dominador Membrano Soriano, 54 anyos nga residente sang nasambit nga lugar.
Ginbawian sang kabuhi ang biktima sa South Cotabato Provincial Hospital samtang ginabulong.
Madumduman nga ginlampusan sang tubo sang suspek nga si Franklin Dollente Cabang, 45-anyos nga residente man sang nasambit nga lugar ang biktima.
Una na nga ginpahayag ni Plt.Col. Hover Antonio, hepe sang Koronadal City PNP nga naguwa sa imbestigasyon sang kapulisan nga nagbaisanay ang suspek kag ang biktima nga naglab-ot sa punto sang pagpanglampos.
Sa karon, yara na sa kustodiya sang Koronadal City PNP ang suspek kag natalan nga pasakaan sang kaso nga kriminal.
