Nagdangat na sa masobra 100 ka tawo ang napatay kag sobra 390 ang ginapatihan nga may kaso sang Ebola sa Democratic Republic of the Congo (DRC), suno sa Africa Centres for Disease Control and Prevention.
Narekord ang virus sa Uganda, kun sa diin may duha ka kumpirmado nga kaso kag isa ka napatay.
Lakip sa mga kumpirmado nga nalatnan amo ang isa ka Amerikano nga doktor sa DRC, nga pagadal-on sa Germany para sa nagakaigo nga bulong kag pag-atipan.
Gin-report man nga may pila ka mga Amerikano nga posible na-expose sa virus kag ginabuligan subong sang gobyerno sang United States.
Nauna na nga gindeklarar sang World Health Organization ang outbreak bilang “public health emergency of international concern,” apang siling nila malayo pa ini mangin pandemic.
Bisan pa sini, ginapaandaman ang publiko nga hugot nga sundon ang mga health protocol, labi na sa paglubong sang mga napatay, bangud mataas ang fatality sang paglapta sang virus.
Nagpatuman naman sang border screening ang mga kaiping nga pungsod pareho sang Rwanda kag Nigeria bilang tikang sa pagpugong sang paglapta sang virus.
Suno naman sa US Centers for Disease Control and Prevention, manubo pa ang fatality sini sa Amerika, apang padayon nila nga ginamonitor ang mga biyahero halin sa mga apektado nga lugar nga nagaabot sa U.S.
Nagpagwa man ang United States sang Level 4 travel advisory — ang pinakamataas nga pahanumdom batok sa pagbiyahe pakadto sa DRC.
Sa karon, wala pa sang aprubado nga bulong ukon bakuna batok sa Bundibugyo strain sang Ebola.
Gani nagapanawagan ang Africa CDC kag WHO sa publiko nga sundon ang mga protocol kag palig-onon ang surveillance sa komunidad agud mapunggan ang paglapta sang virus.
