Depensa ni House Prosecution Spokesperson Atty. Benjamin Tolosa nga indi husto nga rason ang kakulangon sang oras ukon availability sang mga abogado sang depensa para ipaiway ang document comparison nga gamiton sa impeachment trial ni Vice President Sara Duterte.
Suno kay Tolosa, ang direktiba sang presiding officer tuyo nga mapadasig ang trial paagi sa pag-kumparar sang liquidation reports kag iban pa nga common exhibits antes ang nakatalana nga hearing.
Ini matapos nga ginpahayag sang depensa nga sa Agosto 14 pa nila mahimo ang document comparison, bisan nga ginpahibalo na sila sang Miyerkules.
Suno kay Tolosa, indi man kinahanglan nga mag-upod ang bug-os nga legal team sa amo nga proseso bangud 16 ka abogado ang opisyal nga nag-enter sang appearance para sa depensa.
