Nagpabutyag sang pagdumili si Barangay General Paulino Santos (GPS) Kapitan Danilo Delos Santos ang ginhagna nga pag-postpone sang Barangay kag Sangguniang Kabataan Elections 2026.
Sa interview sang Bombo Radyo Koronadal kay Barangay General Paulino Santos (GPS) Kapitan Danilo Delos Santos, iya ginpaathag nga indi dapat magpaapekto ang mga barangay officials sa bisan ano nga desisyon parte sa BSKE kag magpadayon lamang sa pagtuman sang ila mandato sa komunidad.
GInpahayag man niya nga tubtob nga wala pa mangin layi ang mga hagna sa Kongreso, lakip ang House Bill No. 10376 nga nagapanukala nga ibalhin ang BSKE sa Nobyembre 2028, magapabilin ang gintalana nga eleksyon sa Nobyembre 2026 suno sa Republic Act No. 12232.
Para kay Delos Santos, wala sang dako nga epekto sa iya kon ipadayon ukon ipostpone ang BSKE bangod ang iya prayoridad amo ang pagtuman sang iya obligasyon bilang kapitan kag pagserbisyo sa mga residente sang barangay.
