Hugot nga ginpanginwala sang kampo ni Sen. Ronald “Bato” dela Rosa nga indi matuod ang pahayag sang National Bureau of Investigation (NBI) nga “armed and dangerous” ang senador samtang padayon ang operasyon sang mga otoridad may kaangtanan sa ginreport nga arrest warrant halin sa International Criminal Court (ICC).
Ginpahayag sang legal counsel ni Dela Rosa nga si Atty. Jimmy Bondoc nga wala sang kamatuoran ang amo nga paglaragway sa senador.
Suno kay Bondoc, ang NBI mismo ang “armed and dangerous” bangud armado ang ila mga operatiba nga nagapatigayon sang operasyon agud ipatuman ang warrant nga wala pa suno pa naipakita sa kampo sang senador kag wala man nagaagi sa lokal nga korte.
Nauna na nga nagpahayag si NBI Director Melvin Matibag nga standard protocol lang sang ahensya ang pagtratar sa tanan nga subjects sang operasyon ukon mga indibidwal nga ginaserbisyuhan sang warrant bilang “armed and dangerous” bilang kabahin sang ila security precautions.
Ginpahayag ni Matibag nga masami nagaandam ang mga operatiba sa posibilidad nga armado ang ila target agud masiguro ang kaluwasan sang ila mga tauhan sa operasyon.
Samtang, padayon nga ginakuwestyon sang kampo ni Dela Rosa ang legalidad sang ginapatihan nga warrant halin sa ICC, labi na ang wala kuno sini nagaagi sa proseso sang lokal nga hudikatura sang pungsod.
