Nagbabala ang Iran na maglulunsad ito ng katumbas na tugon sakaling magsagawa ang Estados Unidos ng panibagong pag-atake, kasunod ng mga pahayag ni U.S. President Donald Trump na nananatiling bukas sa negosasyon ngunit unti-unti nang nawawalan ng tiwala sa Tehran.
Sa pakikipagpulong ni Iranian Foreign Minister Abbas Araqchi sa mga opisyal mula sa Turkey, Pakistan, at Saudi Arabia, iginiit niyang handa ang Iran na tumugon nang buong lakas sa anumang agresyon mula sa Estados Unidos at Israel.
Nagbabala rin ang Tehran na maaaring maging target ang mga oil at gas facilities sa Saudi Arabia, United Arab Emirates, Qatar, at Israel kung bobombahin ng Amerika ang mga pasilidad ng enerhiya ng Iran.
Kasabay ng tumitinding tensyon, patuloy ding naaapektuhan ang pandaigdigang merkado ng enerhiya. Tumaas ang presyo ng Brent crude oil habang nananatiling limitado ang paglalayag ng mga barko sa Strait of Hormuz, isa sa pinakamahalagang rutang dinaraanan ng suplay ng langis sa buong mundo.
Samantala, iniulat ng Kuwait na napabagsak ng kanilang militar ang ilang drone na umano’y inilunsad ng Iran. May mga ulat din ng pagsabog sa karagatan malapit sa Oman, na lalo pang nagpapataas ng pangamba sa posibleng paglawak ng sigalot sa rehiyon.
Patuloy namang binabantayan ng international community ang sitwasyon dahil sa posibilidad na makaapekto ang alitan sa seguridad at suplay ng enerhiya sa buong mundo.
