Nakatalana na nga ma-usar sang City Government of Koronadal ang dugang nga P20 milyon nga pondo para sa pagkay-o sang mga imprastraktura kag pasilidad nga naguba bangud sang mabaskog nga linog nga nag-igo sa Mindanao sang Hunyo.
Ginkumpirmar ini ni City Mayor Erlinda P. Araquil sa interview sang Bombo Radyo Koronadal, kun sa diin iya ginpahayag ang pagbaton sang P20 milyon nga financial assistance halin sa National Disaster Risk Reduction and Management Fund – Disaster Rehabilitation and Recovery Assistance Fund (NDRRMF-DRRAP).
Personal nga ginbaton sang alkalde ang nasambit nga pondo sa seremonya nga ginpatigayon sa Malacañang Palace sang Nobyembre 5, 2026.
Ang financial assistance ginpahayag nga gintugyan paagi sa opisina ni President Ferdinand R. Marcos Jr. para sa mga syudad nga naapektuhan sang magnitude 7.8 nga linog sa rehiyon.
Luwas diri, ginkumpirmar man ni Mayor Araquil nga ang dugang nga P100 milyon nga pondo halin sa Department of Education (DepEd) para sa rehabilitasyon kag pagpakay-o sang mga hulot-klasehan nga nag-angkon sang halit bangud sang linog.
Paagi sa sini nga mga bulig pinansyal, ginapaabot nga masustentuhan ang mga kinahanglanon nga proyekto sang syudad, partikular sa pagpasanyog liwat sang mga naguba nga pasilidad kag pagsiguro nga mabalik sa normal ang pagamit sang mga buluthuan nga naapektuhan sang kalamidad.
