Nagalugi sang halos ₱2,500 tubtob ₱3,500 sa kada baboy ang mga lokal nga hog raisers sa banwa sang Tampakan, suno kay Mayor Leonardo Escobillo.
Ini ang ginpahayag sang alkalde matapos ang sunod-sunod nga mga miting kaupod ang mga lokal nga hog raisers, meat vendors kag ang Office of the Municipal Agriculturist ukon OMAG agud talakayon ang mga problema sa industriya sang karne sang baboy.
Suno kay Escobillo, ginpresentar sang iya talatapan ang detalyado nga listahan sang nagkalain-lain nga klase sang feeds nga ginagamit sa pagpadaku sang baboy, halin sa piglet feeds, pre-starter, starter, grower tubtob finisher feeds, lakip na ang tagsa ka balor sini.
Ginlakip man sa presentasyon ang kabug-usan nga kantidad sang pagkaon nga nagakonsumo sang isa ka baboy antes ini mabaligya, agud mahibaluan sang OMAG ang aktuwal nga gasto kag mga kabudlayan nga ginatubang sang mga lokal nga hog raisers sa ila adlaw-adlaw nga operasyon.
Suno pa sa alkalde, ginapakita sang datos nga daku ang ginakalahian sang gasto sa pagpadaku sang baboy kag sang presyo nga ila mabaton sa merkado.
Ginpaathag ni Escobillo nga antes, yara lamang sa ₱80 tubtob ₱90 kada kilo ang presyo sang liveweight sang baboy, apang subong nagasaka na ini sa ₱120 tubtob ₱125 kada kilo.
Pinaagi sa mga konsultasyon kag presentasyon sang datos, ginatinguhaan sang lokal nga panguluhan nga mas mahangpan ang sitwasyon sang mga hog raisers kag angay nga mga tikang agud masolusyonan ang mga problema sa industriya sang baboy.
