-- ADVERTISEMENT --
Naghinay sa 3.3 porsiyento ang inflation rate ukon ang kadasigon sang pagsaka sang presyo sang mga balaklon kag serbisyo sa pungsod sang Agosto 2024.
Mas manubo ini suno sa Philippine Statistics Authority (PSA) gikan sa 4.4 porsiyento nga nabalhag sang Hulyo sini nga tuig.
Suno pa sa PSA, yara sa 3.9 porsiyento ang food inflation sang Agosto, 6.4 porsiyento naman sang Hulyo.
Sa bahin sang transportation inflation, naghinay ini sa -0.2 porsiyento.
Samtang sa inflation para sa pinakapigado nga pamilya, nagpanaog ini sa 4.7 porsiyento gikan sa 5.8 porsiyento.
Nagalaum naman ang gobyerno nga magpabilin sa 2 tubtob 4 porsiyento ang inflation subong nga tuig.
