Ginpahanumdom sang Guidance Advocate nga si Heart Balquin, RPm, CHRA, sang Holy Trinity College, nga indi dapat gilayon husgahan ang mga kabataan nga nagapakita sang agresibo ukon indi naandan nga pamatasan.
Sa interview sang Bombo Radyo Koronadal kay Balquin, iya ginpahayag nga mahimo nga may yara sang ginaatubang nga stress, problema sa pamilya, kabudlayan sa pagkontrol sang kaakig ukon iban pa nga psychological factors ang kabataan nga nagapakita sang amo nga pamatasan.
Ginpahayag niya nga importante nga mahibaluan anay ang posible nga ginhalinan sang pagbag-o sa pamatasan sang kabataan antes maghatag sang paghukom ukon silot.
Suno pa sa iya, may mga kabataan nga nagatago sang ila ginabatyag kag indi dayon makapabutyag sang ila mga problema, gani mahimo ini maggwa sa porma sang agresibo ukon indi naandan nga pamatasan.
Gani, ginapanawagan ni Balquin ang mga ginikanan kag teachers nga mangin mapinmatyagon sa mga pagbag-o sa pamatasan kag hatagan ang kabataan sang kahigayunan nga makapamulong kag mapamatian.
Para kay Balquin, ang pagsabat sa kabataan paagi sa paghangop kag husto nga guidance mas importante antes sila hukman bangod ang agresibo nga pamatasan mahimo nga isa ka senyales nga may ginatubang sila nga problema.
