Sa padayon nga kaso batok kay anay Presidente Rodrigo Duterte sa International Criminal Court (ICC) nga may kahilabtanan sa crimes against humanity, ginpahayag sang Prosecution nga magapresentar sila sang mga testigo, libo-libo ka pahina sang dokumento, kag halos 16 ka oras sang audio-visual recordings sa ginapaabot nga confirmation hearing.
Suno kay ICC Prosecutor Karim Khan, sa ila imbestigasyon, nagtipon sila sang madamo nga dokumentaryo nga ebidensya nga kinahanglan pa sang legal nga pagrepaso antes ini igapahayag sa hukmanan. Ginapreparar pa sang Prosecution ang eksakto nga kadamuon sang mga sinulat kag indi sinulat nga ebidensya nga ila pagasandigan sa hearing.
Ginplastar niya nga sa pinakaubos, magalakip ini sang kadamuan sang ebidensya nga ginpresentar sa ila application para sa warrant of arrest batok kay Rodrigo Roa Duterte ubos sa Article 58. Lakip diri ang:
- 421 ka piraso (8,565 ka pahina) sang sinulat nga ebidensya
-9 ka laragway
-30 ka audio-visual files nga may kabug-usan nga 15 ka oras kag 55 minutos - Ginalauman man nga may dugang pa nga ebidensya nga magahalin sa padayon nga imbestigasyon sang prosecution.
- Ginpaathag ni Khan nga ang kadamuan sang dokumentaryo nga ebidensya (lakip na ang indi sinulat) yara sa orihinal nga mga linggwahe amo ang English, Tagalog, kag Cebuano , kag siguruhon sang Prosecution nga ang tanan nga materyales may transcript ukon translation sa English kung kinahanglanon.
- Ginbuyagyag man ni Khan nga sang Marso 21, 2025, nagapahayag na ang Prosecution sang 181 ka items nga may kabug-usan nga 2,787 ka pahina nga ebidensya.
