Nag-apelar si Grace Nancy dela Rosa, asawa ni Senador Ronald dela Rosa sa hudikatura sang Pilipinas nga indi mangin instrumento sa pagpadala sang iya bana sa The Hague, Netherlands.
Ini sa tunga sang paglagas sang mga otoridad sa senador matapos nagpaguwa sang arrest warrant ang International Criminal Court may kaangtanan sa kontrobersyal nga war on drugs.
Ginpanindugan ni Nancy dela Rosa nga dapat bistahon ang tagsa ka Pinoy sa idalum sang kaugalingon nga judiciary kag indi sa dumuluong nga korte.
Suno sa iya, ang boluntaryo nga pagsungka sang gobyerno sa isa ka Pinoy sa international court isa ka pag-ako nga mahuyang kag incompetent ang hustisya sa Pilipinas.
Ginhatagan pagtamod sini nga ginapasobrahan ang kaso sang iya bana bangud sa pulitika.
Kon may matun-an man sa kaso ni anay Presidente Rodrigo Duterte suno sa iya, indi ang pagsungka sang isa pa ka Pinoy.
Bug-os tagipusuon man sia nga nag-apelar sa hudikatura nga indi pag-itugyan ang ila responsibilidad para sa ila katawhan kag ipakigbato ang aton soberanong kinamatarong bangod ang ila desisyon madumduman sa maragtas.
