Ginpanginwala ni Deputy Speaker Janette Garin ang alegasyon nga mas ginaprioridad sang House of Representatives ang impeachment proceedings kontra kay Vice President Sara Duterte kumparar sa mga komunidad nga naapektuhan sang pagbaha kag mabaskog nga ulan bangud sang mga bagyo kag habagat.
Suno kay Garin, padayon ang koordinasyon sang House leadership sa Office of Civil Defense, DSWD kag Department of Health para sa relief kag recovery efforts.
Ginamonitor man sang mga lider sang Kamara ang pagpanagtag sang relief supplies kag ginatan-aw kun ano nga mga programa ang kinahanglan dugangan sang pondo sa madason nga budget season.
Samtang, ginpahayag ni Garin nga indi mahimo nga untatan ang impeachment proceedings bangud kabahin ini sang constitutional duty sang Kongreso.
Ang kaso batok kay Duterte nagalakip sang mga alegasyon sang paglapas sa Konstitusyon, graft and corruption, kag betrayal of public trust may kaangtanan sa ginaalegar nga iregular nga paggamit sang P612.5 milyon nga confidential funds.
