Halos nadoble na ang danyos sa sektor sang agrikultura bangud sa nag-upod nga epekto sang nagligad nga mga bagyo Luis kag Maymay, lakip na ang ginpabakod nga habagat.
Suno sa pinakabag-o nga datos sang Department of Agriculture (DA), naglab-ot na sa P689.66 milyon ang balor sang halit nga gindulot sang mga kalamidad sa sektor sang agrikultura sa pungsod.
Nagdako ini halin sa P347.37 milyon nga ginreport sang ahensya.
Bangud sini, naapektuhan ang 21,115 ka mangunguma sa Ilocos Region, Cagayan Valley, Central Luzon, Calabarzon, Mimaropa kag Western Visayas.
Natabo ini matapos nga naguba sang mga bagyo ang sobra 17,000 metriko tonelada sang mga produkto sa uma kag sobra 19,000 ektarya sang umahan.
Ang pinakadako nga naapektuhan nga mga produkto amo ang bugas, nga ginsundan sang mais, saging, high-value crops, kasapatann kag manok, lakip na ang mga imprastraktura, makinarya kag kagamitan sa agrikultura.
