Nagpaambit sang kilig kag emosyon ang duha ka beses nga Olympic gold medalist nga si Carlos Yulo kag ang iya nobya nga si Chloe San Jose matapos nila ipakita sa publiko ang ila prenup photoshoot nga ginhimo sa Japan.
Paagi sa ila tagsa ka social media posts, ginbalikan sang magkahagguma ang mga nagligad nga eksperyensya, lakip na ang mga pagtilaw kag malipayon nga mga tinion nga ila naagyan sa ila relasyon.
Suno kay San Jose, madamo sila sang mga kabudlayan nga naatubang, apang nangin importante ang ila pagtuo sa Diyos kag paghigugma sa isa kag isa agud mapabilin nga mabakod ang ila relasyon.
Ginpabutyag man niya ang handum nga padayon nga mangin magkaupod sa pagtuman sang ila mga pangandoy sa palaabuton.
Sa pihak nga bahin, ginbalikan naman ni Yulo ang pagsugod sang ila istorya sang gugma.
Una sila nga nagkilalahay sang 2020 kag personal nga nagkita sang 2022.
Suno sa gymnast, dako man ang papel sang Japan sa ila relasyon bangod diri sila nagsugod nga mag-upod kag mas makilalahay.
Nagpabutyag man si Yulo sang iya pagpasalamat kay San Jose bangud sa padayon nga paghigugma kag pagsuporta sini sa iya.
Gintawag pa niya ang iya nobya nga isa sa pinakadako kag pinakamahal nga bendisyon nga nabaton niya halin sa Diyos.
Paagi sa ila mga mensahe kag laragway, ginpakita sang magkasintahan nga sa likod sang ila mga naagyan nga pagtilaw, padayon ang ila handum nga magtukod sang mas matawhay kag malipayon nga palaabuton nga magkaupod.













