-- ADVERTISEMENT --

Nagapangayo sang Executive Order ang mga hog raisers sa Banwa sang Tupi, South Cotabato, nga magabutang sang mas mataas nga floor price sang buhi nga baboy agud mapunggan ang padayon nga pagkalugi sang lokal nga hog industry.

Sa interview sang Bombo Radyo Koronadal ginpahayag ni Arnel Barroso Jr., president sang Titans Hog Raisers Region 12, nga halos 500 na ka pirma ang natipon sang mga hog raisers para sa ila pormal nga petisyon nga ginpresentar sa alkalde sang Tupi.

Sa subong, yara lamang sa P110 tubtob P130 kada kilo ang presyo sang buhi nga baboy, samtang nagalab-ot na sa sobra P2,000 kada sako ang presyo sang feeds, nga nagadugang sa ila production cost.

Ginpahayag ni Barroso nga sobra 50 porsyento sang hog raisers sa pila ka lugar ang nag-untat na sa pagpangabuhian kag ginbaligya ang ila mga nayon nga mga baboy bangud sa padayon nga pagkalugi.

Ginhimo niya nga ehemplo ang Banwa sang Tampakan, South Cotabato nga nagpatuman sang P160 kada kilo nga floor price, nga nakabulig sa ila nga makabaligya sang 20 ka ulo sang baboy sa amo nga presyo. Positibo man suno sa iya ang ila pagpangabay sa alkalde sang Koronadal City nga magpatuman sang kaangay nga tikang.

Ginalauman nga magpatigayon sang pagtililipon sa Banwa sang Tupi sa Miyerkules subong nga Semana upod ang hog raisers kag meat vendors agud pagahisgutan ang ila mga panawagan. Nagpaandam naman si Barroso nga posible magrally sa atubangan sang munisipyo ang mga hog raisers kag ila pamilya kon indi masabat ang ila ginapangayo.

Dugang pa niya, handum sang grupo nga mapatuman ang mas mataas nga floor price sa bilog nga Region 12 agud masigurado nga indi lamang pila ka munisipalidad ang makabenepisyo kag maproteksyunan ang lokal nga industriya sang baboy.