-- ADVERTISEMENT --

Mahimo maapektuhan ang supply sang karne sang baboy sa Pilipinas sa una nga quarter sang 2027, kasunod sang pagpatuman sang 60-day suspension sa pag-import sang nagkalain-lain nga pork products halin sa luwas sang pungsod.

Suno sa United States Department of Agriculture (USDA), ang epekto sini nga tikang ginalauman nga mabatyagan halin sa una nga semana sang Enero tubtob sa temprano nga bahin sang Marso 2027.

Tinutuyo sang Department of Agriculture (DA) nga pabaskugon ang lokal nga industriya sang kasapatan kag buligan ang mga manugsagod sang baboy nga nagahimakas nga makigkompetensya sa pagdagsa sang imported nga karne sa merkado.

Base sa datos sang DA, naglab-ot sa 121,000 metriko tonelada ang imbentaryo sang baboy sang Hulyo, 94 porsyento sini ang ginabug-usan sang imported nga karne.

Samtang, ang mga local hog raisers ang ginreport nga nakaangkon sang kapierdihan nga nagalab-ot sa P27.9 billion sa sulod sang una nga pito ka bulan sang tuig bangud sa pagsaka sang imported pork products.

Ginhatagan man sang importansya sang USDA ang kinahanglanon nga dugangan ang lokal nga produksyon sang baboy sang indi magnubo sa 14 porsyento agud masabat ang demand sang mga konsumidor kag makabulig sa pagmentinar sang nagakaigo nga suplay sa sulod sang pungsod.