Magapadayon ang pagmonitor sang House Committee on Agriculture and Food sa mga farm-to-market road (FMR) projects nga may natukiban nga sala nga coordinates kag nalakip sa ginaproponer nga 2027 national budget.
Kabahin man sa pagatutukan sang komite ang imbestigasyon nga ginapatigayon sang Department of Agriculture (DA) agud mahibaluan ang kabug-usan nga kamatuoran sa likod sang mga nasambit nga sala.
Suno kay Quezon City Representative Mark Enverga, chairperson sang komite, importante nga matino kun sin-o ang responsable, kun daw ano kadako ang epekto sang mga sala kag kun paano malikawan nga liwat ini matabo.
Ginabi-abi man ni Enverga ang panindugan ni DA Secretary Francisco Laurel Jr. nga usisaon ang tanan nga proyekto nga nadalahig sa isyu kag kilalahon ang mga responsable sini.
Magabuligay sa imbestigasyon ang DA kag ang pila ka budget watchdog groups, lakip ang mga grupo nga una nga nagbukas sang isyu nahanungod sa indi husto nga coordinates sang mga proyekto.
Suno sa nauna nga pagpahayag sang DA, walo sa kabug-usan nga 1,669 ka FMR projects nga nalakip sa National Expenditure Program (NEP) ang may sayop nga coordinates.
Ginapatihan nga naghalin ini sa encoding errors ukon sayop nga pag-type sang isa ukon duha ka numero.
Ginapaabot nga paagi sa imbestigasyon, masiguro ang husto nga paggamit sang pondo sang gobyerno kag ang pagpatuman sang mga proyekto sa nagakaigo nga mga lugar.
