Posible nga wala pa matapos ang tensyon sa Senado matapos maglapta ang isyu bahin sa ginapatihan nga panibag-o nga kudeta sa liderato sang Senado kun sa diin ginatukmod si Sen. Sherwin Gatchalian nga posible magbulos kay Sen. Alan Peter Cayetano bilang Senate President.
Sa tunga sang nagapadayon nga tensyon sa Senado, nagsiling sanday Sen, Francis Pangilinan kag Sen. Panfilo Lacson nga si Gatchalian ang ila nakitaan nga mahimo suportaran sang mas madamo nga senador agud mapag-isa liwat ang Senado.
Suno kay Pangilinan, ginasuportaran sang “Solid Bloc 11” si Gatchalian agud magpanguna sa Senado.
Samtang, nagsiling man si Lacson nga may yara ini sang kapasidad kag eksperyensya agud maibalik ang kredibilidad sang institusyon matapos ang asod asod nga kontrobersiya sa nagligad nga mga inadlaw.
Bisan wala sang direkta nga kumpirmasyon bahin sa posible nga liwat nga pag-ilis sang liderato, nagaguwa nga indi pa mabaskog ang bag-o nga mayorya matapos mapahalin sa pwesto si anay Senate president Vicente Sotto III sang Mayo 11.
Naghuwa ini kasunod sang asod asod nga isyu, lakip na ang pagpangluthang sa sulod sang Senado, mga pamangkot sa seguridad, kag ang kontrobersyal nga pagpalagyo ni Sen. Ronald “Bato” dela Rosa halin sa kustodiya sang Senado.
Ginpahayag ni Gatchalian nga preparado siya mag-angkon sang liderato sang Senado kun kinahanglanon, labi na sa atubang sang posible nga impeachment trial batok kay Vice President Sara Duterte.
Gin-ako man niya nga dako nga dagok sa imahe sang Senado ang mga kinagamo nga nagluntad sa nagligad nga semana.
Sa ulihi, ginpabutyag sang minorya nga kinahanglan mabalik ang dignidad kag pagsalig sang publiko sa Senado kag masiguro nga mangin patas kag wala sang pinilian ang pagdumala sa impeachment trial batok sa bise presidente.
