Nagapanawagan sang transparency kag imbestigasyon ang pila ka mga residente sang Barangay Simsiman, Norala, South Cotabato matapos nila ginreklamo ang umano kakulangan sang publiko nga anunsyo sa government scholarship program nga nagahatag sang P20,000 nga financial assistance sa mga incoming fourth-year college students.
Sa sulat sang mga residente, ginpahayag nila nga madamo sang kwalipikado nga estudyante ang wala nakapang-aplay bangud wala kuno sang opisyal nga anunsyo ukon posting sa Facebook page sang barangay ukon sa iban pa nga pamaagi. Suno sa ila, sang nagpangayo sila sang impormasyon, ginpahibalo sila nga napuno na ang tanan nga scholarship slots.
Gani, ginapangayo nila ang pag-imbestigar kon paano kag san-o gin-anunsyo ang aplikasyon, paano ginpili ang mga benepisyaryo, ano ang ginbasehan nga qualifications kag ngaa wala ini napahibalo sa tanan nga kwalipikado nga estudyante sa barangay.
Ginpabutyag man sang mga residente nga wala sila nagapasaka sang akusasyon batok sa bisan sin-o, kundi nagapangayo lamang sang transparency, accountability kag patas nga oportunidad para sa tanan nga mahimo makabenepisyo sang programa.
Samtang, ginpaklaro ni Norala Mayor Clemente Fedoc nga ang P200,000 nga financial assistance nga ginhatag ni Presidente Ferdinand Marcos Jr. sa kada barangay direkta nga gin-download sa mga barangay kag wala na nag-agi sa municipal government.
Suno sa alkalde, may direktiba nga ang P100,000 sang pondo gamiton para sa scholarship program, samtang ang nabilin nga P100,000 yara na sa desisyon sang barangay council kon paano ini gamiton, basta suno sa balaod kag may husto nga liquidation.
Ginpahayag man ni Fedoc nga wala sang ginhatag nga uniform qualifications ukon standard guidelines para sa pagpili sang scholarship beneficiaries, gani nagkalain-lain ang pamaagi sang kada barangay sa implementasyon sang programa.
Bangud limitado ang pondo, posible nga lima lamang ka estudyante ang mabuligan kon P20,000 ang ihatag sa kada benepisyaryo. Suno pa sa alkalde, may mga barangay nga nagpatuman sang draw lots matapos ilakip ang ngalan sang tanan nga nag-aplay agud masiguro ang patas nga pagpili.
Gindugang ni Fedoc nga wala siya sang direkta nga partisipasyon sa implementasyon sang scholarship program bangud direkta ini nga ginapatigayon sa lebel sang barangay officials. Ginpabutyag man niya nga yara sa mga opisyal sang barangay ang responsibilidad sa pagsiguro sang transparency kag patas nga proseso sa pagpili sang mga benepisyaryo.
