Ginadmitar sang testigo sang prosekusyon nga si COA State Auditor Xylene Del Campo nga iya lang personal nga interpretasyon ang pagsiling nga kinahanglan may “madakpan” bilang proof of success antes mabaydan ang rewards halin sa confidential fund.
Ini ang iya sabat sang ginpamangkot siya ni Senate Impeachment Court Presiding Officer Francis Escudero kon nakasulat ini sa Joint Circular 2015-01, nga amo ang opisyal nga giya sa paggasto kag pag-audit sang Confidential kag Intelligence Funds sang gobyerno.
Suno kay Del Campo, iya ini ginbase sa iya mga nauna nga audit kun sa diin may mga dokumento nga nagapakita nga may nadakpan antes ginbaydan ang reward.
Apang ginpamangkot ni Escudero kun may nahibaluan siya nga amo man ini ang standard nga gin-gamit sang mga nag-una sa iya.
Sabat ni Del Campo, subong sila nga nagabase sa Joint Circular sa ila pag-audit, apang ginpunto ni Escudero nga wala mismo sa circular ang requirement nga kinahanglan may madakpan.
Sa ulihi, ginadmitar ni Del Campo nga iya interpretasyon ang amo nga requirement sa pag-audit sang reward payments.
