Naghingyo sang hospital arrest sa Sandiganbayan ang isa ka co-accused ni anay kongresista Zaldy Co sa kaso nga malversation matapos siya ma-stroke samtang yara sa detention.
Nagsumiter sang motion si Juliet Calvo, anay hepe sang Maintenance Division sang Department of Public Works and Highways-Mimaropa, paagi sa iya abogado.
Yara subong sa balay-bululngan si Calvo, 64 anyos, matapos ma-stroke sang Agosto 5 samtang detained sa Women’s Dormitory sa Camp Karingal.
Suno sa iya abogado, naparalisa si Calvo kag indi na makahambal pagkatapos sang stroke.
Bangud sini, ginmando sang Sandiganbayan ang mga doktor ni Calvo nga mag-atubang sa korte kag maghatag sang report bahin sa iya kasamtangan nga kahimtangan antes magpagwa sang desisyon ang korte.
May kaangtanan ang kaso sa ginaalegar nga P289-milyon nga substandard nga flood control project sa Naujan, Oriental Mindoro.
