Wala pa nagatahaw ang gamo sa tunga sang double Olympic gold medalist nga si Carlos Yulo kag sang iya nga pamilya.
Matapos ang pila ka semana nga paghipos sang magtimbang nga bahin, liwat nga nag-ibwal ang isyu bangud sa komento sang amay ni Carlos nga si Mark Andrew Yulo sa duha ka magkatuhay nga social media posts natuhoy sa iya anak nga champion gymnast.
Sa Facebook, nag-post si Carlos sang bag-o nga update sa iya nga kabuhi sa diin ginpakigbahin niya nga magabalik sia sa Paris agud nga suportaran ang mga atleta sa Paris Paralympics 2024.
Diri nagkomento ang amay ni Carlos nga si Mark nga proud sia sa nalab-ot sang iya bata apang nagapati sia nga dapat man ini nga mag-sorry sa iya iloy nga si Angelica Yulo nga nagsakit ang buot sang gintawag sini nga “magnanakaw.”
Amo man ini ang nangin tono sang amay sa iya komento sa isa pa ka social media post angut kay Carlos.
Bangud sini, kaangay nga wala na nakapugong ang nobya ni Carlos nga si Chloe San Jose kag nagsabat sa komento sang amay sang iya nobyo.
Suno kay Chloe, nahibaluan niya nga indi si Mark ang nagkomento sa post ni Carlos nga daw ginapabutyag sang nobya nga may iban nga nagagamit sang Facebook account ni Mark nga amo ang nagkomento sa natumod nga post.
Indi maathag kon sin-o ang ginatumod ni Chloe apang ginsiling niya nga kuntani hambalon man ni Mark nga antes nga magpasakop sa Paris Olympics 2024 si Carlos, ginsumpa sia sang iya iloy nga si Angelica nga magakamang sia sa duta.
Suno pa kay Chloe, may ginbuy-an pa nga mga tinaga si Angelica nga indi na magdaog si Carlos sa iya nga hampang.
Wala pa sang sabat si Mark sa komento sang nobya sang iya anak apang indi man lipod sa ihibalo sang publiko nga indi boto ang pamilya ni Carlos sa relasyon sini sa content creator nga si Chloe.
