Padayon nga ginabantayan kag ginamonitor sang militar kag kapulisan ang mga lugar nga ginakategorisa bilang red areas sa Bangsamoro Autonomous Region in Muslim Mindanao ukon BARMM, lakip ang Datu Odin Sinsuat, Shariff Aguak, Datu Piang, kag Mamasapano.
Sa interview sang Bombo Radyo Koronadal, ginpahayag ni Lt. Col. Ronald Suscano, Spokesperson sang 6th Infantry Division, Philippine Army, nga ginakategorisa sang mga otoridad ang nagkalain-lain nga lugar sa BARMM bilang Yellow, Orange kag Red Areas, suno sa lebel sang seguridad kag posible nga peligro sa tagsa ka lugar.
Suno kay Suscano, ginahatagan sang mas hugot nga pag-monitor ang mga red areas agud malikawan ang posible nga insidente, ilabi na sa tion sang BARMM Parliamentary Elections.
Ginpahayag pa niya nga hugot man nga ginabantayan sang mga otoridad ang mga checkpoint sa nagkalain-lain nga banwa sa rehiyon bilang kabahin sang seguridad kag paglikaw sa bisan ano nga insidente nga mahimo magpabudlay sa hapsay nga pagpatigayon sang eleksyon.
Kaangot sini, nagpanawagan si Suscano sa publiko nga makig-angut kag magbulig sa mga otoridad sa pagmintinar sang malinong, matawhay kag wala sang kagamo nga pagdumala sang eleksyon.
Gin-awhag man niya ang mga kandidato nga magpakita sang patas kag matinud-anon nga pagserbisyo sa publiko, kag tahuron ang proseso sang eleksyon para sa kaayuhan kag kalinong sang mga pumuluyo sa BARMM.
