Patuloy na lumalala ang pagkalat ng Bundibugyo virus disease (BVD), isang uri ng Ebola virus disease, sa Democratic Republic of the Congo (DR Congo), matapos itong kumalat mula sa Mongbwalu health zone sa Ituri Province patungo sa limang probinsya at 49 health zones.
Batay sa pinakahuling datos hanggang Hulyo 30, 2026, umabot na sa 3,605 ang kumpirmadong kaso ng BVD habang 1,587 na ang naitalang pagkamatay, na may case fatality ratio na 44%.
Sa pinakahuling linggo ng ulat, naitala ang pinakamataas na lingguhang bilang ng kaso at pagkamatay mula nang magsimula ang outbreak, kung saan umabot sa 567 ang bagong kaso at 296 ang nasawi. Ipinapakita nito ang patuloy na mabilis na pagkalat ng sakit sa mga apektadong lugar.
Mas pinapalala ng kaguluhan, paglikas ng mga residente, at paggalaw ng mga tao sa mga hangganan ang sitwasyon, na nagiging hamon sa contact tracing, pagtugon sa mga kaso, at pagpigil sa mas malawak pang transmission.
Patuloy namang nagsasagawa ng mga hakbang ang pamahalaan ng DR Congo kasama ang World Health Organization (WHO) at iba pang katuwang upang makontrol ang outbreak. Gayunman, iginiit ng mga awtoridad sa kalusugan na kailangan pa ng mas pinaigting na pagtugon upang mapigil ang pagdami ng kaso.
Samantala, idineklara ng Ministry of Health ng Uganda ang pagtatapos ng BVD outbreak sa kanilang bansa noong Hulyo 28 matapos ang 42 araw na walang bagong kumpirmadong lokal na kaso.
Gayunpaman, nananatili ang banta ng muling pagpasok ng virus sa Uganda dahil sa patuloy na transmission sa kalapit na DR Congo.
Muling iginiit ng WHO ang kahalagahan ng masusing pagbabantay, paghahanda, at pagpapatupad ng mga hakbang sa pagkontrol, lalo na sa mga lugar na apektado ng paggalaw ng populasyon at panganib ng cross-border transmission.
