Nagsampa sang kriminal nga kaso ang Bureau of Internal Revenue (BIR) sa Department of Justice (DOJ) batok sa Sunwest Inc., kaupod ang presidente sini nga si Aderma Angelie Descarga Alcazar kag treasurer nga si Cesar Zacarias Buenaventura, bangud sa ginapatihan nga P22.71 bilyon nga kakulangan sa pagbayad sang buhis halin 2019 tubtob 2024.
Suno sa BIR, nagresulta ang imbestigasyon sa pagpangita sang igo nga basehan sa pagsaka sang kaso sa idalom sang Sections 254 kag 255 sang National Internal Revenue Code (NIRC), matapos madiskubre ang ginapatihan nga underdeclaration sang income, sayop nga pag-claim sang mga gastuhan kag purchases, kag paggamit sang wala suportado nga creditable withholding tax (CWT) credits sa income tax returns sang kompanya.
Ang Sunwest Inc. gin-ulat man nga anay ginapanag-iyahan ni anay kongresista Zaldy Co.
Kabahin ang kaso sa mas daku nga imbestigasyon sang gobyerno may kaangtanan sa mga ginapatihan nga iregularidad sa flood control projects, suno sa direktiba ni Pangulong Ferdinand Marcos Jr.
Base sa imbestigasyon sang National Investigation Division, may daku nga diperensya sa tunga sang mga bayad nga ginreport sang Department of Public Works and Highways (DPWH) kag sang income nga gindeklara sang kompanya.
Noong Pebrero 2026, nagpaguwa ang BIR sang Subpoena Duces Tecum nga nagamando sa Sunwest nga ipresentar ang ila accounting books kag iban nga dokumento. Apang suno sa ahensya, wala ini natuman sing bug-os, gani gin-apply ang Best Evidence Obtainable Rule.
Paagi sini, nakumpirmar sang BIR ang ginapatihan nga wala nadeklarar nga income nga naglab-ot sa P6.29 bilyon. Wala man ginbaton ang P36.63 bilyon nga purchases, P3.65 bilyon nga expenses, kag P291.12 milyon nga CWT claims bangud sa kakulangan sang igo nga dokumento.
Bangud sini, naglab-ot sa P22.71 bilyon ang ginakabig nga tax deficiency sang kompanya lakip na ang surcharges, interes kag penalties.
Suno kay BIR Commissioner Charlito Martin Mendoza, padayon nga magapadayon ang ahensya sa pagsaka sang kaso batok sa mga indibidwal kag kompanya nga nagalapas sa balaod sa buhis bilang kabahin sang Run After Tax Evaders (RATE) Program, nga nagatinguha nga mapabakod ang kampanya kontra tax evasion.
