Ginpaandaman sang Bangon Sambayanan People’s Movement ang publiko nga mangin maalam kag mabinantayon sa pagbaton sang mga impormasyon may kaangtanan sa kahimtangan sang pungsod.
Sa interview sang Bombo Radyo Koronadal, ginpahayag ni Bangon Sambayanan Secretary General Jeffrey “Ka Eric” Celiz ang iya mga kritisismo sa Marcos administration, ilabi na sa mga isyu nga may kaangtanan sa kaimulon, kurapsyon kag ekonomiya.
Suno kay Celiz, yara pa gihapon ang mga problema nga kinahanglan hatagan sang solusyon sang gobyerno, kag ginpahayag niya nga dapat mangin mapanilag ang publiko sa mga pahayag kag programa sang administrasyon.
Gindugang niya nga kinahanglan padayon nga usisaon sang mga mamamayan ang mga ginahimo sang gobyerno kag ang epekto sini sa kabuhi sang mga Pilipino.
Suno pa kay Celiz, kinahanglan nga hatagan sang prayoridad ang pagsolbar sang nagapadayon nga mga isyu sa kaimulon, pagpakigbato sa kurapsyon, kag pagpalig-on sang ekonomiya agud mapabaskog ang kahimtangan sang mga ordinaryo nga mamamayan.
