Nag-surrender sa mga otoridad ang 19-anyos nga out-of-school youth nga ginatudlo nga nagpalapta sang pamahog sa social media sa Barangay Paraiso, Koronadal City.
Sa interview sang Bombo Radyo Koronadal, ginpahayag ni Barangay Captain Danilo L. Leguro nga personal nga nag-atubang sa barangay ang amo nga persona kag nagpahayag sang iya panig nahanungod sa insidente.
Suno kay Leguro sang Barangay Paraiso, ginpahayag sang 19-anyos nga wala siya sang intensyon nga manghadlok ukon magpabatyag sang pamahog sa mga residente sang Barangay Paraiso. Ang iya kuno nga tuyo amo lamang ang pagpadala sang mensahe sa isa ka abyan kag indi para ipalapta sa publiko.
Apang, tungod sa kahadlok sang iya abyan, ilabi na matapos ang insidente sa Banga National High School sang Setyembre 18, 2026, ginsugid sini ang mensahe sa iya ginikanan, nga nagresulta sa pag-report sini sa mga otoridad.
Matapos ang barangay investigation, gindala ang 19-anyos sa Koronadal City PNP para sa dugang nga imbestigasyon kag pagproseso sang nagakaigo nga kaso.
Ginpahayag ni Leguro nga napasangkatan na sang nagakaangay nga kaso ang amo nga persona kag padayon ang proseso sang mga otoridad nahanungod sa insidente.
