KORONADAL CITY – Yara na sa luwas nga kondisyon ang baby boy nga ginhaboy sang wala makilal-an nga ginikanan sini kahilamunan malapit sa pribado nga sementeryo sa Bo.2, Koronadal City.
Sa eksklusibo nga interview sang Bombo Radyo Koronadal kay Ginang Jinky Babar, ginpahayag sini nga ang iya bana nga si Alex ang nakakita sa lapsag samtang nagapanguha sang ugbos sang katumbal sa kahilamunan sa likod nga parte sang ila panimalay kag malapit lamang sa nasambit nga sementeryo.
Gani gintawag suno pa siya sang iuya bana kag didto nila ginkuha ang lapsag nga nagahublas pa wala sang panapton kag madamo sang kinadtan sang lamok.
Gilayon naman nga gindala sa South Cotabato Provincial Hospital ang baby boy kag nahingagaw nga mabulong kun diin gin-utod pa ang pusod sini nga tuman pa ka laba.
Kaangot sini, emosyonal nga nagpawagan si Ginang Jinky sa ginikanan sang lapsag nga kuntani balikan ang bata bangud nagakinahanglan ini sang pag-atipan.
Masakit man para sa iya nga amo ini ang ginhimo sang isa ka wala konsensya nga iloy nga binilin ang iya kaugalingon nga baby.
Dugang pa sini nga kuntani konsensyahon ang iloy sini agud mahimasmasan nga sala ang iya nga ginhimo kag kuntani may kahadlok man lang ini sa mahal nga makaako.
Indi man sini kadugo ang lapsag apang masakit para sa iya ang nadangtana sang lapsag.
Nahibaluan nga ginaimbestigaran na sa karon kun sin-o ang naghaboy sang lapsag sa lugar.
