KORONADAL CITY-Hingyo sa subong sang pamilya sang Maguindanao massacre victims nga padasigan sang Court of Appeals ang pagpaguwa sang resolusyon sang kaso.
Ini makaligad nga nagsumiter sang apela ang pamilya sang 58 ka mga biktima para sa pagpadali sang civil damages makaligad ang 12 ka tuig nga natabo nga makangilidlis nga krimen sanSitio Masalay, Barangay Salman, Ampatuan, Maguindanao.
Sa eksklusibo nga interview sang Bombo Radyo Koronadal kay Atty. Nena Santos, isa sa mga abogada sang mga biktima, makabig nga “usad pagong” ukon mahinay ang proseso sang ila nga apela makaligad ang partial promulgation sang lower court sa kaso sang Disyembre 2019.
Suno pa kay Atty.Santos, wala pa nakabaton tubtub sa subong sang civil compensation ang mga pamilya nga dapat man nga taasan halin sa desisyon ni Atty. Jocelyn Solis- Reyes.
Kadungan sini, ginpasiguro ni Atty.Santos nga indi niya pagpabay-an ang kaso bangud sa tuman ka damo nga kaagagi nila sa pagpamahog sang umpisa pa lamang.
Sa subong , hingyo man sang mga pamilya sang mga biktima nga madakapan ang ang 75 ka mga “at large” pa samtang luyag man nila nga indi na pag-iboto pa ang anu sin-o man nga katapo sang Ampatuan clan sa tion nga magapadalagan sa anuman nga posisyon sa palaabuton nga May 2022 elections.
