Nagpahayag ang isa ka anay alkalde kag abogado nga ginsunod sang House of Representatives ang husto nga proseso sa pagdumala sang impeachment complaint batok kay Vice President Sara Duterte.
Sa interview sang Bombo Radyo Koronadal, si Former Mayor Atty. Antonio Bendita sang Surallah, South Cotabato nagpahayag nga ang pagproseso sang impeachment sa Kamara nagapakita nga ginatuman ang nakasulat nga pamaagi sa Konstitusyon kag dapat ini nga kaso madala sa Senate of the Philippines bilang impeachment court.
Suno sa iya, kun madayon ang pagtalakay sa Senado, mahatagan sang oportunidad ang Bise Presidente nga magpaathag kag klaruhon ang iya panig sa mga alegasyon nga ginahaboy batok sa iya, partikularmente na sa mga isyu nga may kaangtanan sa pag-usar sang pondo.
Gindugang pa ni Atty. Bendita nga importante nga ang proseso magapabilin nga patas kag suno sa layi, agud mapreserve ang integridad sang impeachment proceedings kag malikawan ang paglala sang politikal nga tensyon sa publiko.
