Nagsumiter ang Anti-Money Laundering Council (AMLC) sang tatlo ka petisyon angot sa civil forfeiture ukon pagbawi sang mga assets nga konektado sa korapsyon sa flood control kasunod sang anum ka bulan nga imbestigasyon kag mga freeze orders.
Ginpahayag sang konseho nga sakop sang petisyon ang mga asset sang mga indibidwal kag entities nga una na nga gin-isyu-an sang Court of Appeals sang freeze orders.
Samtang, wala naman gin-detalye sang konseho ang mga pangalan ukon eksakto nga kantidad sang assets nga sakop sang mga petisyon.
Ginpasugtan naman sang Manila Trial Court ang duha ka temporaryo nga asset preservation orders agud masiguro ang monetary instruments samtang nagahulat ang mga kaso.
Suno sa AMLC, ang paghain sang civil forfeiture amo ang katapusan nga tikang agud masiguro nga mabalik ang mga ilegal nga nakawat nga kwarta nga konektado sa anomalya sa flood control projects.
Sa datos sang konseho, nakapag-freeze na ini sang kabug-usan nga P27.8 bilyon nga balor sang assets nga konektado sa ginakabig nga kontrobersiya.
